34 წლის ნიკამ, თავისი თანატოლი გოჩა სოფლის ცენტრში დაიბარა… – ცნობილია ვინ მოკლა ჩემპიონი მოჭიდავე მარტყოფში ეკლესიასთან ახლოს
მკვლელობა სოფელ მარტყოფში – 34 წლის მამაკაცს ჭრილობები ცეცხლსასროლი იარაღით აქვს მიყენებული. არსებული ინფორმაციით, გასროლას წინ ურთიერთშელაპარაკება უძღოდა. სავარაუდო დამნაშავე დაკავებულია.
რამდენიმე გასროლის ხმა სოფელ მარტყოფში ადგილობრივებმა გვიან ღამით, დაახლოებით 12 საათზე გაიგეს. 34 წლის ნიკა სახლთხუციშვილმა, ასევე 34 წლის გოჩა ჯერენაშვილი დაიბარა სოფლის ცენტრში, ეკლესიის მიმდებარე ტერიტორიაზე, შეხვედრის შემდეგ კი დაიწყო კონფლიქტი. ნიკა სახლთხუციშვილმა მეგობარს 5 ტყვია ესროლა. გოჩა ჯერენაშვილი ადგილზე გარდაიცვალა.
მკვლელობის შემდეგ ეჭვმიტანილი ადგილიდან მიიმალა, თუმცა ის დილით პოლიციას თავად ჩაბარდა.
ამ დროისთვის ნიკა სახლთხუციშვილი გადაყვანილია ვაზიანის წინასწარი დაკავების იზოლატორში. მიმდინარეობს დაკითხვა. გამოძიება მას იარაღის უკანონო შეძენა-შენახვა-ტარებას და მკვლელობას ედავება, ბრალი ჯერჯერობით დაზუსტებული არ არის, პროკურატურას ამისთვის 48 საათიანი ვადა აქვს. ბრალის წარდგენის შემდეგ აღმკვეთი ღონისძიების შესახებ თბილისის საქალაქო სასამართლო იმსჯელებს.
„ბავშვობის მეგობარია და აღარ გვყავს. ამ მომენტში უმუშევარი იყო. 34 წლის სპორტსმენი, მოჭიდავე იყო, საქართველოს ჩემპიონი. სახლში იყო და როდესაც გამოვიდა, მაშინ მოხდა მკვლელობა, ცეცხლსასროლი იარაღით არის მოკლული. ადგილზე გარდაიცვალა, ვეღარ ვუშველეთ, როდესაც მივედით. რამდენადაც მე ვიცი, 5 ტყვია ჰქონდა მოხვედრილი”, – ამბობს ადგილობრივი.
„ჩემს ხელში გაიზარდნენ ორივე. ერთიც ჩემი კლასელის შვილია და მეორეც”, – თქვა კიდევ ერთმა ადგილობრივმა.
