თბილისის სახელმწიფო უნივერსიტეტის სტუდენტების ბოიკოტს უცხადებენ დეპუტატ ლექტორს, ნიკოლოზ სამხარაძეს – მიზეზი მისი მხრიდან რუსული კანონის მხარდამჭერაა. სტუდენტები ასე იხსენიებენ “ხალხის ძალის” ინიციირებულ კანონპროექტს “უცხო ქვეყნის აგენტების” შესახებ.
“დღეს, ჩვენს პარლამენტში, საგარეო ურთიერთობათა და უსაფრთხოების კომიტეტების ერთობლივ სხდომაზე განიხილებოდა კანონპროექტი, რომელიც პირდაპირ ეწინააღმდეგება საქართველოს კონსტიტუციას, ეროვნულ ინტერესებს და ძირს უთხრის ქვეყნის ევროპულ და ევრო-ატლანტიკურ მისწრაფებებს.
ამ შეხვედრას თავმჯდომარეობდა თბილისის სახელმწიფო უნივერსიტეტის ლექტორი ნიკოლოზ სამხარაძე. კანონპროექტის თაობაზე მისი მხარდამჭერი პოზიციიდან გამომდინარე, ჩვენთვის მიუღებელია, დავესწროთ მის სალექციო კურსს ევროკავშირის საგარეო პოლიტიკის შესახებ.
აქედან გამომდინარე, ჩვენ, თბილისის სახელმწიფო უნივერსიტეტის საერთაშორისო ურთიერთობების მიმართულების სტუდენტები, უარს ვამბობთ ბატონი ნიკოლოზ სამხარაძის სალექციო კურსის გავლაზე და ვუერთდებით ამავე მიმართულების კურსდამთავრებულების კრიტიკულ პოზიციას” – ნათქვამია განცხადებაში, რომელსაც სტუდენტები ავრცელებენ. განცხადების ავტორები ასევე აანონსებენ სტუდენტური მოძრაობის შექმნას, რომლის მიზანიც იქნება ხელი შეუშალოს ამ კანონის მიღებას.
“მოვუწოდებთ ყველა უნივერსიტეტის სტუდენტს, შემოგვიერთდნენ დასავლური ღირებულებებისთვის ბრძოლაში და არ მისცენ მთავრობას საშუალება მოგვაქციოს რუსულ ორბიტაზე” – წერენ სტუდენტები.
ნიკოლოზ სამხარაძეს გუშინ, პირველ მარტს წერილით მიმართეს ყოფილმა სტუდენტებმა, რომელშიც სთხოვდნენ უარი ეთქვა ამ კანონის მხარდაჭერაზე.
“საქართველოს გარშემო არსებული ურთულესი საერთაშორისო პოლიტიკური ვითარების გათვალისწინებით, ეს გადაწყვეტილება კიდევ უფრო დაამძიმებს ჩვენი ქვეყნის მდგომარეობას, დააკარგვინებს ერთგულ მეგობრებს და გაურკვეველი ვადით გადაავადებს მის ევროპულ მისწრაფებებს.
ამავდროულად, წარმოდგენილი კანონპროექტი მთლიანად უგულებელყოფს იმ უაღრესად მნიშვნელოვან როლს, რასაც საერთაშორისო პარტნიორების დახმარებით სამოქალაქო საზოგადოების ორგანიზაციები ეწევიან საქართველოში. ის პირდაპირ ეწინააღმდეგება დემოკრატიისა და თავისუფლების იდეალებს – სწორედ იმ ღირებულებებს, რომლებზეც არაერთხელ გვისაუბრია თქვენს ლექციებზე.
ამ ყოველივეს გათვალისწინებით, იმედს ვიტოვებთ, რომ საჯაროდ გამოთქვამთ კანონპროექტისადმი უარყოფით პოზიციას და შეძლებთ თქვენი კოლეგების დარწმუნებას კანონპროექტის მიზანშეუწონლობაში” – წერდნენ ყოფილი სტუდენტები დეპუტატს და სთავაზობდნენ საუნივერსიტეტო სივრცეში საჯარო შეხვედრას ამ კანონპროექტზე სამსჯელოდ.
დღეს პარლამენტში ხმაურიან განხილვას “უცხო ქვეყნის აგენტების” კანონის შესახებ, რომელიც საგარეო ურთიერთობების და იურიდიული კომიტეტების გაერთიანებულ სხდომაზე იმართება, სწორედ ნიკა სამხარაძე უძღვება.
