“დინამო თბილისი” ნებისმიერ ინიციატივას, რომელიც ეწინააღმდეგება საქართველოს ევროპულ გზას, საფრთხედ მიიჩნევს:
“როგორც ჩვენ ფეხბურთს, ისევე ჩვენ ქვეყანას სჭირდება მეტი განვითარება და საქართველოს მოსახლეობის უდიდესმა ნაწილმა არაერთხელ დააფიქსირა, რომ ამ განვითარების საშუალებას მხოლოდ ევროპულ ოჯახთან ერთად ხედავს. ევროკავშირში გაწევრიანება უნდა იყოს ჩვენი ქვეყნის ერთ-ერთი მთავარი მიზანი და ამ გზის მართებულობა არ უნდა დაექვემდებაროს გადახედვას…” – წერია საფეხბურთო კლუბ “დინამო თბილისის” მიერ ფეისბუკზე გამოქვეყნებულ განცხადებაში.
საქართველოს პარლამენტი განიხილავს “ხალხის ძალის” ინიციატივას, ე.წ. უცხოეთის აგენტების თაობაზე, რომელსაც მმართველი პარტიაც უჭერს მხარს.
კანონპროექტებს საქართველოს პარტნიორი ქვეყნები და ევროკავშირი “შემაშფოთებელს” და „ევროკავშირის ღირებულებებსა და პრინციპებთან შეუთავსებელს“ უწოდებს.
საფეხბურთო კლუბ „დინამოს“ შემდეგ საქართველოს ევროპული მომავლის მნიშვნელობაზე პოსტს ოფიციალურ გვერდზე აქვეყნებს საფეხბურთო კლუბი „გაგრაც“.
„შეუძლებელია გაგრას ევროპული არჩევანი არ გააჩნდეს, რადგან მხოლოდ ევროპულ ოჯახშია შესაძლებელი მოგვშორდეს დევნილობის მძიმე ტვირთი.
რადგან მხოლოდ ევროპაა გზა ჩვენი მიწიდან ოკუპანტის განდევნის.
რადგან მხოლოდ ევროპაა გზა – ერთ მშვენიერ დღეს დავბრუნდეთ ჩვენს სახლში, გაგრაში, და მეტოქეებს საკუთარ არენაზე ვუმასპინძლოთ.
რადგან თავად საქართველოა ევროპა!“ — წერს საფეხბურთო კლუბი.
უკვე ერთ კვირაზე მეტია, საქართველოში არაერთი საზოგადოებრივი ჯგუფი ეწინააღმდეგება საპარლამენტო უმრავლესობის რუსულ კანონპროექტებს, რომელთა მიზანი ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა. მსგავსი კანონი რუსეთში 2012 წლიდან სწორედ სამოქალაქო ორგანიზაციებისა და მედიის რეპრესიებისა და საბოლოოდ, ქვეყნიდან გასაძევებლად გამოიყენეს.
მიუხედავად საქართველოში დაწყებული საზოგადოების პროტესტისა, პარლამენტმა აღნიშული კანონპროექტები პირველი მოსმენით მიიღო და უკვე საკომიტეტო მოსმენებიც დაიწყო, რომელზე დასწრების საშუალებას არ აძლევენ იმ ადამიანთა დიდ ნაწილს, რომლებსაც ეს კანონპროექტი ეხებათ.
კანონის მიღებას ასევე ეწინააღმდეგება აშშ, ევროკავშირი და არაერთი დასავლური ორგანიზაცია.
ჩვენი მომავალი მხოლოდ ევროპული შეიძლება იყოს. დამოუკიდებლობის დღიდან, ავად თუ კარგად, შევძელით და უკეთესი ქვეყანა გავხდით, მაგრამ ასეთ გადამწყვეტ ეტაპზე, პრობლემები ძალით არ უნდა შევქმნათ. დაუშვებელია ჩვენი არჩევანისთვის კითხვის ნიშნის დასმა, დაუშვებელია მისი გადახედვა. ჩვენ არ შევდივართ არანაირ ევროპაში, ჩვენ მისი ნაწილი ვართ”- წერს შოთა არველაძე სოციალურ ქსელში.
