„ნებისმიერი სპეკულაცია საფუძველმოკლებულია. გასაგებია, რომ ბევრისთვის მიუღებელია საკითხი, მაგრამ ხელისუფლება იმიტომ ვართ, რომ რაც სჭირდება ქვეყანასა და ხალხს, ის გავაკეთოთ“, – ამის შესახებ პრემიერ-მინისტრმა ირაკლი ღარიბაშვილმა ე.წ. აგენტების შესახებ კანონპროექტზე საუბრისას განაცხადა.
მისივე თქმით, საქართველოში უამრავი არასამთავრობო ორგანიზაცია არსებობს, რომლებიც ანტისახელმწიფოებრივად მოქმედებენ და საჭიროა, რომ მათი ფინანსები საზოგადოებისთვის გამჭვირვალე იყოს.
„ჩვენ ძალიან ბევრი არასამთავრობო ორგანიზაცია ვიცით, რომელიც პირდაპირ ებრძვის სახელმწიფოებრიობას, სახელმწიფოს ინტერესებს, რომლებიც უცხოეთიდან მიღებული დაფინანსებით ატარებენ ანტისამთავრობო მიტინგებს, ბევრ პროვოკაციულ ღონისძიებას, რომელიც არ ემსახურება ეროვნულ ინტერესებს. მათი ეს დაფინანსება არ არის გამჭვირვალე. მეორე მხრივ, ისინი ჩვენ მოგვიწოდებენ, რომ სრულად გამჭვირვალე იყოს, პარლამენტისა და მთავრობის საქმიანობა და ეს ასეც არის, ჩვენ გამჭვირვალობით ვართ ერთ-ერთ მოწინავე პოზიციაზე, თუნდაც ბიუჯეტის გამჭვირვალობით ნომერ პირველ პოზიციაზე ვართ მსოფლიოში. ასე რომ, ვფიქრობ, აბსოლუტურად უსაფუძვლოა კამპანია, რომელიც მიმდინარეობს. მესმის, რომ მათთვის ეს მტკივნეულია, რადგან წლების განმავლობაში ათეულობით მილიონ გრანტს იღებდნენ და არავითარი გამჭვირვალობა ჩვენი საზოგადოების წინაშე არ არსებობდა. ძალიან მკაფიოდ იქნა განმარტებული, რომ ჯერ იგეგმება ამ ორივე კანონპროექტის პირველი მოსმენით მხარდაჭერა, ამის შემდეგ ეს კანონპროექტები გაიგზავნება ვენეციის კომისიაში, ჩვენ დაველოდებით მათ რეკომენდაციებსა და შეფასებას და პარლამენტი გააგრძელებს განხილვასა და მსჯელობას ამ საკითხზე“, – განაცხადა ღარიბაშვილმა.
