საპარლამენტო ოპოზიციის წარმომადგენელი “ევროპელი სოციალისტებიდან” ფრიდონ ინჯია 2008 წლის აგვისტოს ომის დროს მაშინდელი პრეზიდენტისა და “სააკაშვილის უცხოელი მფარველების” პასუხისმგებლობაზე საუბრობს. დღეს, 28 თებერვალს, პარლამენტში გამართულ ბრიფინგზე მან საპარლამენტო საგამოძიებო კომისიის შექმნა და პროკურატურაში გამოძიების დაწყება მოითხოვა.
დეპუტატი ამბობს, რომ საქართველოს იმდროინდელმა პრეზიდენტმა მიხეილ სააკაშვილმა “მთავარი დანაშაული” “ქართული სახელმწიფოს და ქართველი ხალხის წინაშე ჩაიდინა”.
“ყველამ ვიცით, რომ სააკაშვილი ყველა ნაბიჯს ამერიკელებს უთანხმებდა და მათ გარეშე ვერცერთ ზემოთ ნახსენებ ქმედებას ვერ დაგეგმავდა და განახორციელებდა. განსაკუთრებით ეს შეიძლება ითქვას [ჯორჯ] ბუშის [იმ დროს აშშ-ის პრეზიდენტის] 2005 წლის ვიზიტის შემდეგ საქართველოში.
ამერიკელებმა კარგად იცოდნენ, რომ სააკაშვილის მიერ ცხინვალის დაბომბვას რუსეთი პასუხი მოჰყვებოდა, რაც საბოლოოდ რუსეთსაც და ევროპასაც სერიოზულ დაპირისპირებას მოუტანდა. 2008 წლის ომმა პირველად გააჩინა ბზარი ევროპასა და რუსეთს შორის, როგორც ეს ეხლა გრძელდება უკრაინის ომიდან გამომდინარე. ამერიკამ მაშინ ჩვენ და ახლა კი მთელი ევროპა და უკრაინა გაწირა”, – თქვა დეპუტატმა.
მან 2008 წლის ომს “ევროატლანტიკური შეთქმულება” უწოდა.
“ამ ევროატლანტიკური შეთქმულების შედეგად გაიწირა ჩვენი ორი ისტორიული კუთხე – აფხაზეთი და სამაჩაბლო, დაიღუპა ასეულობით ქართველი ჯარისკაცი და მშვიდობიანი მოქალაქე და საკუთარ სამშობლოში დევნილად იქცა 30 ათასი ადამიანი… ადამიანებს, რომლებიც დღესაც საქართველოს ომში გახვევას ცდილობენ, 2008 წლის უმძიმესი დანაშაული არავითარ შემთხვევაში არ უნდა შერჩეთ”, – თქვა პარლამენტის დეპუტატმა.
